Valur hefur valdið vonbrigðum í upphafi móts í Bestu deild karla. Í gær fékk liðið á sig jöfnunarmark gegn Fram í blálokin og er því aðeins með 5 stig eftir fjóra leiki.

Lið Vals var til umræðu í Þungavigtinni í gær en þar velti þáttastjórnandinn Ríkharð Óskar Guðnason því til að mynda upp hvort ekki þyrfti að hrófla við byrjunarliðinu, setja menn eins og Tryggva Hrafn Haraldsson og Jónatan Inga Jónsson á bekkinn um stundarsakir.

„Hvað vantar inn á völlinn? Þú ert með Adam Ægi á bekknum, Guðmundur Andri er að koma til baka. Þú ert með Lúkas Loga. Væri hugmynd að reyna að setja smá blóð á tennurnar á mönnum eins og Tryggva Hrafni og Jónatani Inga sem mér finnst persónulega ekkert hafa komið út úr?“ spurði Ríkharð.

„Ef þeir fara ekki á bekkinn eftir þennan leik þá fara þeir ekkert á bekkinn. Tryggvi Hrafn er búinn að vera ömurlegur,“ svaraði Kristján Óli Sigurðsson ómyrkur í máli.

„Hann var allt í lagi á móti FH í síðasta leik,“ skaut Mikael Nikulásson inn í áður en Kristján tók til máls á ný.

„Fyrr má vera ef þú ert með milljón á mánuði að þú sért allt í lagi í fjórða hverjum leik, andskotinn hafi það, drullastu í gang. Hann klikkar á markteig, hittir ekki boltann. Svona er sumarið hjá honum búið að vera,“ sagði hann um Tryggva.