Sharon Stone og Liam Neeson hafa bæst í hóp þeirra Hollywood-leikara sem kallað hafa eftir því að Kevin Spacey fái að halda áfram með leikaraferil sinn.

Mail Online fjallar um þetta.

Spacey, sem hefur unnið til tveggja Óskarsverðlauna, var sýknaður af kviðdómi í Lundúnum í fyrra í kynferðisbrotamáli sem höfðað var gegn honum. Var hann sakaður um að hafa brotið kynferðislega gegn fjórum karlmönnum á árunum 2001 til 2013.

Hafa Stone og Neeson bæst í hóp með þeim Stephen Fry, F. Murray Abraham og Sir Trevor Nunn sem hafa komið leikaranum til varnar eftir að heimildarmyndin Spacey Unmasked var sýnd á Channel 4 í Bretlandi á dögunum.

Spacey, sem er 64 ára, var rekinn úr Netflix-seríunni House of Cards árið 2017 eftir að ásakanir komu fram gegn honum. Máli sem höfðað var gegn honum í New York var vísað frá árið 2022 og svo var hann sýknaður í Lundúnum í fyrra eins og að framan greinir.

Stone segist ekki geta beðið eftir að sjá Spacey á hvíta tjaldinu á nýjan leik og kallar hann „snilling“ sem margir leikarar líta upp til. Liam Neeson segist hafa orðið sorgmæddur þegar ásakanir voru bornar á Spacey. Segir hann að Spacey sé góður maður og bransinn þurfi á honum að halda.