fbpx
Föstudagur 21.júní 2024
Fréttir

28 milljóna beltagrafa eyðilagðist þegar hún rann í sjóinn: Eigandinn fær ekki krónu í bætur af þessari ástæðu

Ritstjórn DV
Mánudaginn 20. maí 2024 08:00

Grafan var samskonar og sú sem sést á myndinni.

Ekki missa af Helstu tíðindum dagsins í pósthólfið þitt

Lesa nánar

Héraðsdómur Reykjavíkur hefur sýknað tryggingafélagið Vörð af kröfu verktakafyrirtækis á Egilsstöðum vegna altjóns sem varð á fokdýrri beltagröfu sumarið 2022.

Um var að ræða gröfu af gerðinni Hyunday HX380L og var verðmæti hennar 28 milljónir króna samkvæmt vátryggingarskírteini gröfunnar.

Þann 16. ágúst 2022 var verið að nota gröfuna við að dýpka höfnina í Borgarfirði eystra. Rann grafan þá skyndilega af stað út í höfnina og hafnaði í sjónum. Málsaðilum, verktakafyrirtækinu og tryggingafélaginu, greindi á um ástæðu þess að það gerðist.

Í lögregluskýrslu vegna málsins sagði stjórnandi gröfunnar að hann hafi verið með vélina á grjótpúða úti í sjónum þar sem hann var að fleyga en grjótpúðinn gefið sig með þeim afleiðingum að vélin fór út í sjó og á bólakaf. Dómkvaddur matsmaður fór yfir tjónið á gröfunni og mat það svo að viðgerð væri ekki forsvaranleg og því um að ræða altjón. Taldi hann virði hennar þá vera 26,7 milljónir króna.

Tryggingafélagið taldi að tjónið félli ekki undir húftryggingu á vátryggingarskírteini. Benti félagið á að vinna við dýpkun hafnar fæli í sér sérstaka áhættu sem félagið var ekki upplýst um þegar tryggingin var keypt.

Í niðurstöðu dómara eru skilmálar tryggingarinnar tíundaðir en þar segir:

„Félagið bætir skemmdir af vinnuvélinni sjálfri og eðlilegum aukahlutum, svo sem grjótgrindum  og  venjulegum útvörðum, af  eldingu, eldsvoða  (ef eldur verður laus) og sprengingu sem stafar af honum, af árekstri, áakstri, veltu eða hrapi vinnuvélarinnar, grjóthruni, snjóflóði úr fjallshlíð og skriðufalli.“

Verktakafyrirtækið sem um ræðir, Ylur ehf., byggði á því að tjónið á gröfunni hefði orðið vegna hraps vélarinnar, grjóthruns og skriðufalls en því mótmælti Vörður.

Að mati dómsins var ekki hægt að fallast á að grafan hefði „hrapað“ í umrætt sinn þar sem grafan rann til. Dómurinn féllst ekki heldur á að slysið hafi orðið vegna „grjóthruns“ og féllst á það með Verði að með orðinu grjóthrun sé átt við að grjót hrynji á ökutæki. Að lokum féllst dómurinn ekki heldur á að tjónið hafi orðið vegna „skriðufalls“ enda hafi grjótpúðinn gefið sig undan þunga vélarinnar.

Verktakafyrirtækið hélt því einnig fram að Vörður hefði viðurkennt bótaskyldu í málinu með því að lýsa því yfir að tryggingafélagið myndi greiða allan kostnað við að bjarga gröfunni úr sjónum. Í dómnum er bent á að björgunarkostnaður hafi ekki verið hluti af umræddri tryggingu og þegar slysið varð hafi tildrög slyssins ekki legið ljós fyrir. Var því ekki fallist á það með fyrirtækinu að Vörður hefði með þessu viðurkennt bótaskyldu.

Var Vörður því sýknaður af kröfum verktakafyrirtækisins í málinu.

Hér má sjá myndband af atvikinu sem Austurfrétt birti:

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Fréttir
Fyrir 21 klukkutímum

Hilda Jana gáttuð á framgöngu meirihlutans á Akureyri – Láta aldraða bíða, neita að borga reikningana og neita að gera grein fyrir máli sínu

Hilda Jana gáttuð á framgöngu meirihlutans á Akureyri – Láta aldraða bíða, neita að borga reikningana og neita að gera grein fyrir máli sínu
Fréttir
Í gær

Dagur Þór dæmdur í tveggja ára fangelsi – Beitti hnúajárni gegn starfsmanni í Nettó

Dagur Þór dæmdur í tveggja ára fangelsi – Beitti hnúajárni gegn starfsmanni í Nettó
Fréttir
Fyrir 2 dögum

Leikskólaplássum fækkað um 940 og meirihlutinn geti bara kennt sjálfum sér um stöðuna – Tap foreldra geti numið 6,5 milljónum

Leikskólaplássum fækkað um 940 og meirihlutinn geti bara kennt sjálfum sér um stöðuna – Tap foreldra geti numið 6,5 milljónum
Fréttir
Fyrir 2 dögum

Ekki tekst að uppfylla húsnæðisþörf á árinu og biðlistar langir

Ekki tekst að uppfylla húsnæðisþörf á árinu og biðlistar langir