Í gær bárust risatíðindi þess efnis að Gylfi Þór Sigurðsson væri nú laus allra mála. Þetta hefur verið á allra vörum.

Gylfi var þann 16. júlí árið 2021 handtekinn á heimili sínu í Manchester, var honum gefið að sök að hafa brotið gegn ólögráða einstaklingi.

Eftir rúma 600 daga í farbanni frá Bretlandi er Gylfi frjáls ferða sinna og málið látið niður falla, taldi saksóknari engar líkur á sakfellingu í málinu.

Sparkspekingurinn Mikael Nikulásson ræddi málið í Þungavigtinni.

„Ef hann vill halda áfram í fótbolta eru þetta bara geggjaðar fréttir. Þetta eru ekki heldur slæmar fréttir fyrir nýjan landsliðsþjálfara á fyrsta degi. maður hefur heyrt þær sögusagnir að hann ætli að hætta í fótbolta en það gæti breyst núna,“ segir Mikael, en Age Hareide tók við landsliðinu í gær.

Mikael telur að málið sé stærra en flestir geri sér grein fyrir. „Þetta er fáránlegt mál, líka hvað þetta tók langan tíma.

Það er alveg ljóst að þetta er ekki bara eitthvað eitt mál hjá Gylfa Þór Sigurðssyni. Það getur ekki verið. Þetta teygði sig eitthvað mikið lengra. Þess vegna hefur þetta tekið svona langan tíma.“

Mikael segir að Gylfi þurfi ekki að hafa áhyggjur ef hann langar til þess að halda áfram að spila fótbolta.

„Það munu lið berjast um hann, ef hann hefur áhuga.“