Arnar Þór Viðarsson hefur verið þjálfari karlalandsliðs Íslands síðan í lok árs 2020. Síðan þá hefur hann slitið samstarfi við nokkra.
Málið var til umræðu í hlaðvarpsþættinum Dr. Football í gær. Þar voru rifjuð upp nokkur af þeim skiptum þar sem Arnar hefur kosið að starfa ekki áfram með fólki.
„Arnar Þór Viðarsson virðist vera afar átakamiðaður. Honum tekst ekki að vinna með Lars Lagerback,“ segir Hjörvar Hafliðason, en Lars var ráðgjafi í teymi Arnars Þórs fyrst um sinn. Hann er auðvitað fyrrum þjálfari karlalandsliðsins og fór með því á lokakeppni EM 2016.
Hjörvar heldur áfram. „Hann getur ekki unnið með Þorgrími Þráins. Það hlýtur að vera einhvers konar Evrópumet. Hann gat ekki unnið með Frikka (Friðriki Ellert Jónssyni) sjúkraþjálfara.“
Albert Brynjar Ingason bendir þá á að Arnar hafi ekki valið Albert Guðmundsson í hópinn á dögunum, þar sem hann var ekki sáttur með hugarfar leikmannsins. „Svo kemur smá togstreita á milli leikmanns og þjálfara og þá er leikmaðurinn utan hóps,“ segir Albert Brynjar, sem er frændi sóknarmannsins.
