Roman Abramovich, eigandi Chelsea, hefur ákveðið að selja félagið. Hann mun hlusta á tilboð í félagið. Hann gaf út yfirlýsingu nú rétt í þessu.

Þetta kemur í kjölfar innrásar Rússa í Úkraínu. Abramovich er Rússi. Hann var áður mikill vinur Vladimir Putin, forseta Rússlands. Hann hafnar því þó að þeir séu félagar í dag.

Á dögunum var greint frá því að Abramovich hafi skilið við Chelsea tímabundið en nú er ljóst að hann mun selja félagið endanlega. Hann er talinn hræðast refsiaðgerðir Breta.

Hansjorg Wyss, milljarðamæringur frá Sviss, er sagður hafa áhuga á að kaupa Chelsea en líklega þarf 3 milljarða punda til að kaupa félagið.

Roman hefur lánað Chelsea 1,5 milljarð punda í gegnum eignarhaldsfélag sitt en hann hefur aldrei farið fram á að félagið endurgreiði það.

Sagt er að Abramovich sé líka að skoða að selja fasteignir víða um heim vegna innrásar Rússa í Úkraínu.

,,Ég hef alltaf tekið ákvarðanir í þágu félagsins. Í ástandinu sem nú varir hef ég því ákveðið að selja félagið,“ segir meðal annars í yfirýsingu Abramovich.

Abramovich segir einnig að sölunni verði ekki flýtt og að hann muni ekki biðja um að lán verði endurgreint, líkt og kom fram ofar.

Þá hefur Abramovich sett af stað söfnun þar sem ágóðinn rennur til fórnarlamba yfirstandandi stríðs í Úkraínu.