Declan Rice hefur slegið í gegn hjá West Ham upp á síðkastið og hefur verið í frábæru formi á þessu tímabili.

Rice er samningsbundinn West Ham til ársins 2024 en liðið vill bjóða honum nýjan og betri samning og tryggja sér leikmanninn til fleiri ára. Það er ekki víst að það takist en nokkur félög í ensku úrvalsdeildinni hafa áhuga á kappanum og þar á meðal Manchester United.

Paul Parker, fyrrum leikmaður Manchester United, er afar hrifinn af Declan Rice og segir algjört lykilatriði fyrir United að tryggja sér þjónustu leikmannsins.

„Declan er besti miðjumaðurinn á landinu. Ef þeir ná að semja við Rice verður hann orðinn fyrirliði liðsins innan 12 mánaða,“ sagði Parker.

Harry Maguire er fyrirliði Manchester United í dag en það eru ekki allir stuðningsmenn liðsins sáttir við það. Rio Ferdinand sagði nýlega að hann hafi fengið bandið alltof snemma og ætti ekki að vera fyrirliði hjá félagi eins og Manchester United.