Markajafntefli Aftureldingar og Selfoss í Lengjudeildinni var til umræðu í markaþætti Lengjudeildarinnar á Hringbraut á mánudag. Þar töldu meðlimir þáttarins að meiri stöðugleika vanti hjá báðum liðum.
Leikurinn var kaflaskiptur. Afturelding komst í 2-0 áður en Selfoss náði að snúa leiknum sér í vil, 2-3. Aftureldingu tókst þó að jafna aftur í 3-3. Það urðu lokatölur.
,,Þetta er nú kannski bara saga liða sem eru í fallbaráttu. Það eru kaflar hjá báðum liðum sem eru góðir en það er stöðugleiki í 90 mínútur sem vantar á báðum stöðum,“ sagði Hörður Snævar Jónsson, þáttastjórnandi.
Hrafnkell Freyr Ágústsson, sérfræðingur þáttarins, tók í svipaðan streng.
,,Bæði lið þurfa líka að læra að verjast betur og halda aðeins markinu hreinu því bæði lið virðast alltaf leka inn mörkum.“
Rætt var um þennan leik sem og alla aðra leiki 7. umferðar Lengjudeildarinnar í þættinum á mánudag. Hann má nálgast hér fyrir neðan.
