Arnar Þór Viðarsson landsliðsþjálfari Íslands í knattspyrnu mun í dag velja hóp sinn fyrir komandi verkefni í undankeppni HM. Liðið leikur þrjá heimaleiki gegn Rúmeníu, Norður-Makedóníu og Þýskalandi.
Ljóst er að það hefur verið vandasamt verk fyrir Arnar að smíða saman hóp en fjarvera lykilmanna er áberandi þegar komið er að landsliðsverkefni.
Flestum Íslendingum er kunnugt um stöðu Gylfa Þórs Sigurðssonar, þessi besti knattspyrnumaður Íslands síðustu ár var handtekinn í júlí vegna gruns um um brot gegn barni. Gylfi Þór er laus gegn tryggingu fram í október en rannsókn lögreglu er í fullum gangi.
Alfreð Finnbogason, Sverrir Ingi Ingason og Hörður Björgvin Magnússon verða allir frá vegna meiðsla, allir þrír hefðu líklega verið í byrjunarliði Arnars Þórs í þessu verkefni.
Þá hafa bæði Aron Einar Gunnarsson og Rúnar Alex Rúnarsson verið í einangrun síðustu daga vegna COVID-19 smits en vonir standa til um að báðir verði klárir í verkefni landsliðsins.
Meiddir:
Alfreð Finnbogason
Sverrir Ingi Ingason
Hörður Björgvin Magnússon
Hafa glímt við COVID-19:
Aron Einar Gunnarsson
Rúnar Alex Rúnarsson
Staðan hjá Gylfa Þór:
Landsliðsmaðurinn Gylfi Þór Sigurðsson verður áfram laus úr haldi lögreglu gegn tryggingu til 16. október hið minnsta. Gylfi er til rannsóknar í Bretlandi, grunaður um kynferðisbrot gegn barni. Málið rataði í fjölmiðla í síðasta mánuði en Gylfi má ekki yfirgefa Bretland á meðan rannsókn stendur yfir.
Jákvætt sumar:
Það eru þó ekki bara neikvæðir hlutir sem blasa við Arnari nú þegar hann far inn í verkefnið, landsliðið lék þrjá fína æfingaleiki í upphafi sumars. Brynjar Ingi Bjarnason kom þá inn í sitt fyrsta verkefni og var eins og klettur í vörn landsliðsins. Hann og Hjörtur Hermansson léku vel í hjarta varnarinnar, Guðmundur Þórarinsson nýtti tækifæri sitt vel í vinstri bakverði og Ísak Bergmann Jóhannesson sýndi snilli sína.
Fleiri leikmenn áttu góð verkefni en íslenska liðið þarf hið minnsta sex stig úr þessum þremur heimaleikjum til að eiga von á sæti í umspili um laust sæti á HM í Katar árið 2022.
