Eftir aukningu smita í samfélaginu undanfarið var knattspyrnufélögum gert óheimilt að vera með veitingasölu á leikjum hjá sér. Elvar Geir Magnússon, blaðamaður á Fótbolta.net, ræddi upplifun sína úr Árbæ fyrr í vikunni þar sem fólk fór krókaleiðir til að næla sér í kaffi og með því.
Elvar var á leik Fylkis og Leiknis í Pepsi Max-deild karla á þriðjudag. Í hálfleik mátti fólk ekki kaupa sér kaffi á vellinum vegna sóttvarnarreglna. Því fór hluti mannskapsins yfir í Árbæjarlaug, sem er nálægt Wurth-vellinum, heimavelli Fylkis. Þar mátti kaupa veitingar.
,,Einn allra fáránlegasti leikþáttur sem er í gangi núna er að það sé bannað að vera með veitingar á fótboltavöllum. Þá fór ég í Árbæjarlaugina, ásamt fleirum. Það var bara rölt yfir úr stúkunni og yfir í Árbæjarlaugina þar sem má að sjálfsögðu selja kaffi og muffins og ís og ég veit ekki hvað og hvað. Þarna var bara hópur af fótboltabullum sem var mættur að reyna að komast í kaffi. Svo var fólk þarna á sama tíma, sá konu með dóttur sína að reyna að komast í sund en hún komst ekkert að því það voru bara fótboltaaðdáendur að kaupa veitingar í sundlauginni,“ sagði Elvar í hlaðvarpsþættinum Innkastið á Fótbolta.net.
,,Þetta er svo fáránlegt á svo mörgum levelum,“ sagði Tómas Þór Þórðarson þá.