Þorkell Máni Pétursson gagnrýndi þá sem sáu um útsendingu frá leik Dana og Finna á Evrópumótinu í dag. Hann sagði að of mikið hafi verið sýnt frá því sem fór fram á vellinum í kjölfar þess að Christian Eriksen hneig niður á vellinum.
Staðan var markalaus á 40. mínútu þegar mjög drungalegt atvik kom upp. Eriksen hneig niður og það þurfti að beita skyndihjálp. Það var lítið um að vera þegar Eriksen féll til jarðar og fljótt kom í ljós að um eitthvað alvarlegt væri að ræða. Sjúkrastarfsmenn mættu á staðinn og beittu hjartahnoði. Það kom svo í ljós síðar, til mikillar hamingju, að Eriksen væri vaknaður eftir að hafa verið fluttur á sjúkrahús.
Eftir atvikið gátu áhorfendur sem horfðu á leikinn í sjónvarpi fylgst lengi með þessari óhugnanlegu atburðarás.
,,Maður verður að velta fyrir sér myndstjórninni frá þessu Evrópumóti. Hún er bara galin. Það var mikið sýnt, konan hans kom þarna inn og það var hrikalegt að horfa á þetta,“ sagði Máni í þættinum ,,EM í dag“ á Stöð 2 Sport.
Máni hrósaði Guðmundi Benediktssyni einnig fyrir það hversu fagmannlegur hann var í útsendingunni á þessum erfiðu augnablikum. Guðmundur lýsti leiknum.