Grótta og Fjölnir áttust við á Vivaldi-vellinum á Seltjarnarnesi í Pepsi-Max deild karla í kvöld. Um sannkallaðan botnbaráttuslag var að ræða þar sem þessi tvö lið vermdu neðstu sæti deildarinnar.
Fjölnismenn komust yfir á 21. mínútu leiksins eftir mark frá Orra Þórhallssyni. Staðan í leikhléi 0-1 fyrir Fjölni.
Gróttumenn jöfnuðu á 64. mínútu þegar að Pétur Theódór Árnason skoraði sitt þriðja mark í Pepsi-Max deildinni í sumar.
Það tók þó Fjölnismenn ekki nema 2 mínútur að komast aftur yfir í leiknum. Brotið var á Grétari Snæ Gunnarssyni, leikmanni Fjölnis innan vítateigs. Jóhann Gunnarsson tók vítaspyrnuna og skoraði fram hjá Hákoni Rafni í marki Gróttu.
Þegar allt virtist stefna í fyrsta sigur Fjölnismanna í deildinni á þessu tímabili, ákvað Tobias Sörensen spilla gleðinni. Hann kom boltanum í netið á 84. mínútu eftir hornspyrnu Kristófers Orra Péturssonar.
2-2 jafntefli því staðreynd í þessum botnbaráttuslag. Fjölnir situr eftir leikinn í 12. sæti með 5 stig, 9 stigum frá öruggu sæti. Grótta er í 11. sæti með 7 stig, 7 stigum frá öruggu sæti.
Pepsi-Max deild karla
Grótta – Fjölnir
0-1 Orri Þórhallsson (’21)
1-1 Pétur Theódór Árnason (’64)
1-2 Jóhann Gunnarsson (’66)
2-2 Tobias Sörensen (’84)
Upplýsingar um úrslit og markaskorara eru fengnar af urslit.net
