Rúrik Gíslason, landsliðsmaður, útilokar ekki að spila í úrvalsdeild karla en hann er án félags þessa stundina.
Rúrik ræddi við Vísi.is um framtíðina í dag og einnig um erfiða kveðjustund hjá Sandhausen í Þýskalandi.
Rúrik spilaði með Sandhausen í tvö ár en var beðinn um að taka á sig launalækkun vegna COVID-19 og í kjölfarið settur í æfingabann.
Miðjumaðurinn vildi sjá þessi 20 prósent fara til góðgerðamála en félagið tók ekki vel í það.
„Eru ekki alltaf líkur? Ég ætla ekki að útiloka neitt, en það er svo sem ekkert á döfinni heldur,“ sagði Rúrik við Vísi um hvort hann gæti spilað í úrvalsdeildinni í sumar.
,,Stutta sagan er bara að ég ákvað í ljósi þess að við vorum beðnir um að taka á okkur launalækkun að mínum tuttugu prósentum væri betur varið í góðgerðarmál. Mér er svo sem illa við að þurfa að taka það fram.“
,,Það fór ekki betur en svo að ég var settur í æfingabann og sendur heim með hlaupaprógram og þurfti að hlaupa fyrir utan húsið mitt það sem eftir var tímabils.“