Halldór Árnason aðstoðarþjálfari Breiðabliks er ánægður í nýja starfinu. Óskar Hrafn Þorvaldsson var ráðinn þjálfari Breiðabliks í vetur og vildi fá Halldór með sér. Samstarf þeirra gekk vel í Gróttu en Halldór hefur víðtæka reynslu úr þjálfun, hann hefur starfað sem þjálfari í 13 ár. Mest í yngri flokkum en hefur verið í meistaraflokki síðustu ár.

Halldór ræðir komuna til Breiðabliks við hlaðvarp félagsins. „Það var mikið rætt og ritað hvað Óskar myndi gera, við heyrðumst nokkrum sinnum og fram á síðasta daga var hann að ákveða sig. Þegar hann ákveður að fara í Kópavoginn þá sest ég niður með Gróttu, þar er mér boðið að taka við liðinu. Það var ótrúlegt tækifæri að vera aðalþjálfari í Pepsi Max-deildinni, eftir að hafa velt þessu fyrir mér. Á þessum tímapunktu vildi ég fara í Kópavoginn og keyra á það verkefni,“ sagði Halldór i samtali við vefsíðu félagsins.

Halldór er ánægður með skrefið í Kópavog og hefur þetta um leikmannahóp félagsins að segja. „Besti leikmannahópur sem ég hef þjálfað.“

Samstarfs Halldórs og Óskars hefur gengið vel og hann segir Óskar með ótrúlegan metnað í starfi. „Við sjáum fótbolta með líkum augum, að lokum þá komust við alltaf að niðurstöðu sem við erum báðir mjög sáttir við. Við höfum ekki þurft að rífast, við færum rök með eða á móti. Hann er krefjandi að því leiti, hann er duglegasti maður sem ég hef kynnst á ævinni. Drifkrafturinn og dugnaðurinn sem hann sýnir í starfi, verður til þess að þeir sem vinna með honum dragast úr lestinni eða þú ferð á annað stig sjálfur. Það hefur gerst í okkar samstarfi.“

Halldór hefur mikið að segja um það hvernig fótbolta Breiðablik spilar og hvaða leikmenn spila. „Ég hef upplifað að ég sé mjög mikilvægur í teyminu, Óskar er ábyrgur og frontar þá en það er hlutverk aðstoðarþjálfara að bakka það upp. Ég hef verið ánægður með það hlutverk sem ég hef verið í síðustu ár.“