Það stefnir í stríð hjá fjarskiptafyrirtækjum nú þegar enski boltinn er að fara af stað aftur. Síminn er rétthafi af enska boltanum en fyrirtækið var sektað um 500 milljónir á dögunum. Vodafone og Nova bjóða nú áskrift á þúsund krónur.
„Niðurstaða Samkeppniseftirlitsins er að verðlagning Símans á Enska boltanum sem hluta af Heimilispakkanum hafi lagt stein í götu keppinauta fyrirtækisins og takmarkað möguleika þeirra til að laða til sín viðskiptavini,” sagði í niðurstöðu eftirlitsins.
Sagt er að brotinn séu til þess að styrkja stöðu Símans sem hefur sterka stöðu fyrir á fjarskiptamarkaði. Síminn hafi selt enska boltann á þúsund krónur á mánuði þegar þjónustan var hluti af heimilispakka fyrirtækisins en annars kostaði hann 4.500 krónur
Nú bjóða bæði Vodafone og Nova enska boltann á þúsund krónur sem er það verð sem Síminn hefur gefið fólki sem er með heimilispakka hjá fyrirtækinu. „Það eru frábærar fréttir að geta boðið neytendum lægra verð í kjölfar ákvörðunar Samkeppniseftirlitsins. Er það von okkar að þessi verðlækkun verði varanleg og að neytendur geti nálgast vöruna á þessu verði óháð því hvaða fjarskiptafélag þeir eiga viðskipti við,“ segir Heiðar Guðjónson, forstjóri Sýnar, í tilkynningu frá fyrirtækinu.
Orri Hauksson forstjóri Símans segir í hádegisfréttum RÚV að Vodafone sem sé markaðsráðandi fyrirtæki sé að undirbjóða markaðinn. Vodafone borgar Símanum 3500 krónur fyrir hverja áskrif af enska boltanum sem fyrirtækið selur. „Við skoðum alla kosti,“ sagði Orri þegar hann var spurður um hvort Síminn myndi skoða að leggja fram kæru vegna málsins.
„Þetta er auðvitað sérstakt í þessu tilfelli að þarna er aðili sem hefur verið skilgreindur markaðsráðandi á mörkuðum fyrir áskriftarsjónvarp annars vegar og sjónvarpsdreifingu hins vegar og slíkir aðilar mega ekki beita skaðlegri undirverðlagningu eins og það er kallað. En ef einhver ákveður að kaupa af okkur vöru og selja á lægra verði á markaði þá er það ákvörðun viðkomandi,“ sagði Orri.
Orri sagði enn fremur að hann ætti ekki von á öðru en að Samkeppniseftirlitið tæki málið fyrir þar sem Vodafone sé markaðsráðandi fyrirtæki þegar kemur að sölu á áskriftum að sjónvarpsefni.
