Stórleikur helgarinnar í ensku úrvalsdeildinni fór fram á sunnudag á Old Trafford í Manchester. Manchester United fékk þá Lierpool í heimsókn en leiknum lauk með jafntefli. Þetta var í fyrsta sinn á tímabilinu sem Liverpool tapar stigum í deildinni. Marcus Rashford skoraði fyrsta mark leiksins fyrir United nokkuð seint í fyrri hálfleik. Staðan var 1-0 þar til á 85. mínútu en Adam Lallana tryggði gestunum þá eitt stig. Lokastaðan, 1-1.
Fyrir leik mátti sjá leikmenn United og Liverpool faðmast og kyssast í göngunum, um var að ræða Fred og Andreas Pereira hjá Manchester United og Roberto Firmino og Fabinho hjá Liverpool. Allir koma þeir frá Brasilíu og ekki útilokað að þeir séu talsvert að eyða tíma saman utan vallar, Roy Keane fyrrum fyrirliða United blöskraði þetta. Hann sjálfur var og er harðhaus af gamla skólanum, þar kaupa menn ekki svona „vitleysu“.
,,Þú ert á leið í stríð, faðmlög og kossar. Ekki horfa á þá,“ sagði Keane reiður.
Steve Sidwell sem átti farsælan feril var boltastrákur hjá Arsenal þegar hann var yngri, hann var í unglingaliði félagsins og vildi áritun frá Keane. ,,Ég get skilið hvað Roy Keane var að segja,“ sagði Sidwell.
,,Ég man eftir því þegar ég var ungur drengur hjá Arsenal, ég var á Highbury með leikskrá og hann sagði mér að fara til fjandans. Hann væri að fara í stríð við Arsenal.“
,,Þetta voru þröng göng og í dag get ég skilið hvað hann var að meina. Þeir voru að mæta keppinautum sínum.“
Umræðuna má sjá hér að neðan.