Höskuldur Gunnlaugsson, leikmaður Breiðabliks, átti flottan leik í kvöld er liðið mætti FH í efstu deild.
Blikar lentu 2-0 undir í Kaplakrika en sneru leiknum sér í vil og unnu að lokum flottan 4-2 sigur.
,,Við vorum staðráðnir í því að gera ekki eins og í síðasta leik og héldum að við værum búnir að læra af mistökunum en svo kemur það svolítið í andlitið á okkur aftur,“ sagði Höskuldur.
,,Aftur sýnum við karakter en munurinn núna er að við vinnum leikinn. Núna tvo leiki í röð þá bognum við en brotnum ekki sem er gott.“
,,Það er oft hægara sagt en gert að skora mörk gegn liði sem hafa misst mann útaf, sérstaklega ef þeir eru að leiða þá geta þeir pakkað saman og varið markið.“
,,Við vorum mjög grimmir og gráðugir og uppskárum eftir því.“
,,Ég veit það ekki, það er eitthvað sem maður lærði í Augnablik,“ sagði Höskuldur svo að lokum spurður að því af hverju hann væri að skora svo mikið af skallamörkum.
