3. umferð Pepsi Max-deildar karla lauk í gær þegar Fylkir náði í stig á Meistaravöllum gegn KR.
Á föstudag unnu Blikar góðan sigur á Víkingum, á sama tíma vann FH öflugan sigur á KA.
Stjarnan lagði HK á heimavelli. Á laugardag gerðu ÍBV og Grindavík 2-2 jafntefli.
Krísan á Hlíðarenda heldur áfram en liðið tapaði gegn ÍA á laugardagsvöldið.
Sóknin gerir upp þessa 3. umferð hér að neðan en þátturinn er í boði Pepsi Max. Gestur þáttarins er Hrafn Norðdahl.
Það var slegið á létta strengi í þætti dagsins og var trefill Helga Sigurðssonar aðeins ræddur.
Helgi var með fallegan trefil á hliðarlínunni í gær en sagan segir að þetta sá rándýr Gucci trefill.
Hörður Snævar Jónsson, ritstjóri 433.is, hefur þó heyrt annað og að þessi trefill hafi verið keyptur á götumarkaði í Tyrklandi.
Það er að sjálfsögðu ekkert að því en sagan sem Hörður segir var ansi skemmtileg í þætti dagsins.
,,Það sem vakti mesta athygli í þessum leik var Gucci trefillinn sem Helgi Sig er að skarta í upphafi móts. Þetta er svakalegur trefill!“ sagði Hörður.
,,Ég veit ekki hvort hann eigi heima í Pepsi Max-deildinni en það er önnur saga. Ég fékk sent í gær að Helgi væri að ganga með fake Gucci trefil!“
,,Það er harður Fylkismaður sem sagði mér það og þessi trefill hefur verið keyptur á götumarkaði í Tyrklandi, að þetta væri ekki ekta.“
,,Helgi! Rífðu þig í gang þetta er ekki í boði!“