Það er fátt leiðinlegra en að ætla að baka eitthvað gómsætt en gera sér síðan grein fyrir því í miðju kafi að engin egg eru til á heimilinu. Við á matarvefnum fáum einmitt margar spurningar frá fólki í neyð um hvað í ósköpunum sé hægt að gera þá og sleppa við ferð í matvöruverslunina í miðjum klíðum.
Það kemur kannski á óvart að það er hægt að nota ýmislegt í staðinn fyrir egg í uppskriftum.
Til dæmis er hægt að nota þrjár matskeiðar af mæjónesi í staðinn fyrir eitt egg, en eins og margir vita eru eggjarauður aðaluppistaðan í mæjónesi. Við mælum þó ekki með að nota mæjónes í staðinn fyrir öll eggin ef uppskriftin kallar á fjögur egg eða fleiri.
Einnig er hægt að mauka banana og blanda honum saman við hálfa teskeið af lyftidufti í staðinn fyrir eitt egg. Þessi leið er góð þegar um eitt til tvö egg ræðir í uppskrift.
Ef aðeins er eitt egg í uppskriftinni er tilvalið að blanda saman tveimur matskeiðum af vatni, einni matskeið af olíu og tveimur teskeiðum af lyftidufti. Það svínvirkar.
Svo eru það þeir sem þola alls ekki egg og vilja jafnvel minnka fituinnihald í uppskriftum. Þá er hægt að nota eina litla dós af sódavatni, eða 330 sentilítra, í staðinn fyrir egg, olíu og vatn í kökumixi sem keypt er úti í búð. Þá er einnig hægt að nota um það bil 1/4 af bolla, eða sextíu grömm, fyrir hvert egg í öðrum hefðbundnum uppskriftum.
Sjá einnig:
Eitt besta húsráð sem við höfum heyrt: Sjáðu hvað þú getur notað í bakstur í staðinn fyrir egg