Nú eru flestir eflaust búnir að ákveða hvað á að vera í jólamatinn og farnir að undirbúa kræsingarnar. Að því tilefni vill Matvælastofnun, MAST, koma mikilvægum upplýsingum til landsmanna um matargerð til að forðast matarborna sjúkdóma.
„Sjúkdómsvaldandi bakteríur geta borist inn í eldhúsið með kjöti og jarðvegi sem fylgir grænmeti og borist þaðan í önnur matvæli á eldhúsborðinu eða í ísskápnum. Einnig geta þær borist í matvæli frá þeim sem meðhöndlar matvælin og frá þeim búnaði og áhöldum sem eru notuð í eldhúsinu,“ stendur í frétt á vef MAST og bætt við að hreinlæti, kæling og rétt hitun matvæla skipti höfuðmáli.
„Nóróveirur geta dreift sér hratt á jólunum og mikilvægt að einstaklingar með einkenni matarborna sjúkdóma haldi sig frá matargerð. Reglulegur handþvottur minnkar líkur á smiti milli aðila eða frá menguðum matvælum.“
MAST býður einnig upp á eins konar tékklista og brýnir fyrir fólki að hafa þessi atriði í huga við matargerð, um jólin sem og á öðrum tímum:
• Hrátt kjöt og safi úr því skal ekki komast í snertingu við matvæli sem eru tilbúin til neyslu.
• Þvoum ávexti og grænmeti til að varna því að bakteríur af því berist í matvæli sem eru tilbúin til neyslu.
• Þvoum hendur áður en hafist er handa við matreiðslu og eftir snertingu við hrátt kjöt og óþvegið grænmeti.
• Þrífum skurðarbretti og áhöld strax eftir notkun eða notum sérstök skurðarbretti fyrir kjöt, grænmeti og tilbúin matvæli.
• Skipuleggjum ískápinn vel og höldum honum hreinum til að varna því að krossmengun verði þar.
• Skiptum reglulega um borðtuskur, viskastykki og handþurrkur.
Er einnig bent á í fréttinni að takmarka ætti þann tíma sem mikilvæg matvæli eyða við stofuhita.
„Bakteríur fjölga sér mjög hratt við kjöraðstæður. Við 37°C getur ein baktería fjölgað sér í 1000 á 3 tímum og í 1 milljón á 6 tímum. Það er því mikilvægt að geyma og meðhöndla matvæli við það hitastig að komið verði í veg fyrir hraða fjölgun baktería með því að takmarka þann tíma sem viðkvæm matvæli, s.s. reyktur og grafinn fiskur og álegg er á borðum við stofuhita. Mest hætta er á fjölgun baktería þegar hitastig matvælanna er milli 5 og 60°C. Nægileg hitameðhöndlun drepur bakteríur og geymsla við kælihitastig (0-4°C) takmarkar fjölgun þeirra. Ef halda á matvælum heitum skal þeim haldið við 60°C og við kælingu hitaðra matvæla skal gæta þess að þau nái 4°C á 3 tímum.“
Ættu sem flestir að lesa þessar ráðleggingar MAST, enda geta matarbornir sjúkdómar sett strik í reikninginn í jólahaldinu.
„Landsmenn eru hvattir til að tileinka sér hreinlæti, rétta meðhöndlun og kælingu matvæla í eldhúsinu svo koma megi í veg fyrir að matarbornir sjúkdómar spilli jólagleðinni.“
