„Það getur varla farið öðruvísi en að fargjöldin hækki og framboðið minnki, sýnist manni,“ segir Egill Helgason fjölmiðlamaður í pistil sínum á Eyjunni um kaup Icelandair á WOW air.

Egill segir að þetta séu væntanlega góð tíðindi fyrir íslenska ferðaþjónustu en ekki endilega jafn góð tíðindi fyrir íslenska neytendur.

„Samkvæmt því sem ég kemst næst hafa Icelandair og Wow verið í samkeppni á eftirtöldum flugleiðum. Þarna eru náttúrlega þær fjölförnustu, bæði austan hafs og vestan, en innan um leiðir þar sem færra fólk ferðast,“ segir Egill sem telur upp flugleiðirnar:

Amsterdam, Berlín, Boston, Brussel, Chicago, Cleveland. Dallas, Dublin, Dusseldorf, Frankfurt, Kaupmannahöfn, London, Montreal, Mílanó, New York, Orlando, París, San Franscisco, Stokkhólmur Toront, Vancouver, Washington.

Hann segir að líklega sé WOW forðað frá þroti með þessu.

„Staðan hefur greinilega verið býsna vonlaus þrátt fyrir skuldabréfaútboðið. Það er gott á sinn hátt. Hefði verið mikið áfall ef starfsemin hefði einfaldlega stöðvast. Það hefði verið mikið áfall fyrir íslenska ferðaþjónustu. En frá samkeppnissjónarmiði virka þetta eins og vondar fréttir – að minnsta kosti fyrir íslenska neytendur,“ segir Egill sem segir að þetta geti varla farið öðruvísi en að fargjöld hækki og framboð minnki.

„Spurning hvaða áhrif verða á ferðamannastrauminn til Íslands, hvort hægt verði halda uppi sætaframboðinu og verðum sem eru samkeppnishæf alþjóðlega?

Icelandair hefur þá enga samkeppni frá íslensku flugfélagi – þótt vissulega keppi það við erlend félög eins og Easy Jet og Norwegian á vissum leiðum. Það er svolítið eins og að fara mörg ár aftur í tímann.“