„Ég var að verða níu ára vestur á Flateyri við Önundarfjörð þegar ég ákvað að verða blaðamaður. Ég stofnaði þá blaðið Viljann og gaf út, vélritaði það upp (engar tölvur til) og fyrstu blöðin voru fjölrituð. Nú kynnum við til leiks nýjan vefmiðil — Viljinn.is — og vonum að landsmönnum líki vel,“ skrifar Björn Ingi Hrafnsson í yfirlýsingu þar sem hann fylgir úr hlaði nýjum vefmiðli, Viljinn.is, þar sem hann er ritstjóri.
Björn Ingi lýsir Viljanum sem borgaralegum fjölmiðli þar sem áhersla verður lögð á að dýpka umræðuna, fremur en keppast við að birta fréttirnar sem allir aðrir eru að birta. Jafnframt segir á vefnum um þennan nýja fjölmiðil:
„Hann hefur skoðun á málum, vill að betur sé hugað að eldri borgurum og barnafjölskyldum, vill huga að gömlum og góðum gildum og telur að gera þurfi stórátak í húsnæðismálum til að skapa sátt milli kynslóðanna. Viljinn er öðrum þræði hugveita fyrir áhugaverðar tillögur um það sem betur má fara og mun m.a. gangast fyrir ráðstefnum, skoðanakönnunum og fleiru.“
Björn Ingi er þekktur fyrir feril sinn í stjórnmálum, var til dæmis lengi borgarfulltrúi Framsóknarflokksins. Björn Ingi stofnaði vefmiðilinn Pressuna árið 2009 og árið 2015 varð hann útgefandi DV og gegndi því hlutverki fram á haustið 2017 er nýir eigendur tóku við DV.