Lögreglan á Suðurnesjum handtók um helgina karlmann sem játaði við skýrslutöku að hafa brotist inn í Apótek Suðurnesja um þar síðustu helgi og stolið þaðan miklu magni af lyfjum.
Þetta kemur fram í skeyti frá lögreglu. Þar segir að einkum hafi verið um að ræða ýmsar tegundir verkjalyfja og annarra ávanabindandi lyfja. Andvirði þess sem stolið var er áætlað á fjórða hundrað þúsund krónur.
Maðurinn hafði brotið festingu í glugga og komist þannig inn. Hann var með mikið magn lyfja í vörslum sínum þegar lögregla handtók hann.
