Aðalmeðferð í máli Thomasar Møller Olsen fer fram í Landsrétti í dag. Hinn þrítugi grænlendingur var dæmdur í 19 ára fangelsi í héraðsdómi fyrir morðið á Birnu Brjánsdóttur í janúar 2017.
Møller Olsen neitar því staðfastlega að hafa myrt Birnu. Málsvörn hans byggir á að skipsfélagi hans, Nikolaj Olsen, hafi átt úlpuna sem fannst blóðug um borð í togaranum Polar Nanoq. Nikolaj var um borð í Kia Rio-bílnum þegar Birna steig upp í bílinn í miðbæ Reykjavíkur. Nikolaj bar fyrir sig minnisleysi vegna ofneyslu á áfengi.
Møller Olsen hefur haldið því fram að úlpan sé of lítil á sig. Hann hefur mátað hana undir eftirliti tæknideildar lögreglunnar og verður mynd af honum í úlpunni lögð fram í dag.
Kallað verður á ný vitni og munu skipverjar bera vitni í gengum síma.
Aldrei hefur verið upplýst hvað nákvæmlega átti sér stað nóttina sem Birna lést. Samkvæmt lögreglunni voru 130 til 150 óútskýrðir kílómetrar eknir á Kia Rio-bifreiðinni. Fjölmiðlar munu ekki flytja fréttir af skýrslutökum fyrr en þeim lýkur.
