Valur Lýðsson, sem situr í gæsluvarðhaldi grunaður um að hafa valdið dauða bróður síns, Ragnars Lýðssonar, segist ekkert muna sökum ölvunar. Verjandi Vals, Ólafur Björnsson, segir í samtali við RÚV hann hafi áttað sig á orðnum hlut þegar hann rankaði við sér um morgni síðastliðins laugardags. Valur er ábúandi á bænum Gýjarhóli II.
Þriðji bróðirinn var handtekinn en svo sleppt. Samkvæmt verjanda Vals er hann líkamlega fatlaður eftir heilablóðfall. „Ragnar heitinn mun hafa verið að keyra hann austur í heimsókn eins og þeir hafa oft gert. Hann var farinn að sofa á undan hinum og svo veit enginn meira hvað gerist,“ segir Ólafur í samtali við RÚV.
Lögregla hefur greint frá því að áverkar leiddu til dauða Ragnars Lýðssonar samkvæmt bráðabirgðaniðurstöðu krufningar. Ragnar fannst látinn að Gýgjarhóli II að morgni laugardagsins 31. mars síðastliðinn. Ragnar lætur eftir sig sambýliskonu og fjögur uppkomin börn.
