Gagnrýnd eftir að fyrirtæki styrktu umfjöllun um veisluna – Auglýsti vörur og þjónustu frá alls 9 fyrirtækjum
„Mér finnst ég ekki þurfa að svara einhverri gagnrýni þar sem ég var ekki að særa neinn,“ segir lífstílsbloggarinn Tinna Alavis í samtali við blaðamann DV.is. Nýleg bloggfærsla Tinnu, þar sem hún fjallar um nýafstaðna afmælisveislu þriggja ára dóttur sinnar hefur vakið töluvert umtal á samfélagsmiðlum undanfarna daga. Í færslu Tinnu eru níu fyrirtæki nefnd á nafn, sem ýmist útveguðu veitingar eða skreytingar fyrir barnaafmælið, og er augljóst að þarna er á ferð svokölluð „sponsuð“ færsla- þar sem fyrirtæki hafa útvegað fría þjónustu eða vöru gegn því að fá umfjöllun á blogginu.
Svokölluðum lífstílsbloggsíðum hefur fjölgað hratt undanfarin misseri, en þar er ekki óalgengt að greinarhöfundar tjái sig um ákveðnar vörur eða þjónustu frá fyrirtækjum gegn því að borgað eða með því fá viðkomandi vöru ókeypis. Hefur þetta vakið upp gagnrýnisraddir, þar sem trúverðugleiki bloggaranna er dreginn í efa og spurt hvort viðkomandi greinarhöfundur láti umfjöllunina ráðast af eigin skoðun eða markaðstengdum öflum. Tinna hefur undanfarin misseri haldið úti bloggsíðunni Alvis.is þar sem hún segir frá daglegu lífi sínu en athygli vekur að nánast hver einasta færsla er unnin í samstarfi við eitt eða fleiri fyrirtæki.
Í umræddri færslu Tinnu um barnaafmælið má finna myndir sem teknar voru í veislunni en ljóst er að þar var engu til sparað. Meðal annars má sjá útprentaðar servíettur með nafni afmælisbarnsins á veisluborðinu.
Tinna tekur sérstaklega fram nöfn þeirra fyrirtækja sem standi að baki veitingunum og skreytingunum í veislunni. Lætur hún fylgja með lofsamleg orð um flest þeirra og hvetur jafnframt lesendur til að nýta sér þjónustu þeirra.
„Ég var svo ánægð með afmælistertuna frá Sætum syndum en hún bragðaðist einstaklega vel. Ég valdi vanillubotna með smjörkremi! Ummm svo gott! Kökurnar frá þeim eru algjör listaverk en þær eru líka himneskar á bragðið & henta við öll tækifæri & gleðistundir. Hvort sem það er barnaafmæli, ferming, gifting eða bara tækifærisgjöf þá eiga kökurnar frá Sætum Syndum alltaf við“
segir á einum stað í færslunni og á öðrum stað er ritað:
„Allt nammið í skálunum er úr matvöruversluninni Iceland. Þeir eru með mjög gott úrval á nammibarnum sínum en það er 50% afsláttur á nammibarnum alla föstudaga, laugardaga & sunnudaga!“
Þá er tekið fram í smáu letri neðst í færslunni: „Færslan inniheldur spons.“
Þegar blaðamaður DV bar gagnrýnina undir Tinnu og spurði hana út í samstarf bloggara við fyrirtæki svaraði hún því að hún kysi að hafa umfjöllunina aðeins á blogginu en ekki víðar. Að öðru leyti vildi hún ekki tjá sig um umrædda færslu.
„Þú talar um “svona samstarfi“ en ég tek það alltaf fram í hverri bloggfærslu ef um samstarf er að ræða. Mér finnst ég ekki þurfa að svara einhverri gagnrýni þar sem ég var ekki að særa neinn. Ég hefði ekki gert neitt öðruvísi.“
