53 skora á Guðna Th. að segja af sér vegna stóra ananas-málsins: „Valdi að sitja á þessum öfgafullu skoðunum sínum“

„Fyrir mörg okkar erum við líka svikin af Guðna Th., þar sem hann valdi að sitja á þessum öfgafullu skoðunum sínum, fram yfir forsetakosningarnar. Því hljóta úrslit forsetakosninganna 2016 að verða ógild, þar sem ómögulega er hægt að styðja slíkan öfgamann í opinberu embætti, hvað þá sem fulltrúa lýðveldisins.“

Þennan texta er að finna á síðunni Change.org þar sem skorað er á Guðna Th. Jóhannesson forseta Íslands að pakka niður á Bessastöðum og víkja úr embætti. Þó ekki sé mikil alvara hjá þeim sem skorar á Guðna að segja af sér hafa rúmlega 50 manns kvittað undir.

Ástæðan er eitt mesta hitamál þessarar viku, og óhætt að fullyrða að það hafi verið meira áberandi á samfélagsmiðlum en sjómannaverkfallið og það er hvort ananas eigi heima á pítsum. Vísir birti frétt þar sem fram kom að Guðni Th. Jóhannesson, forseti Íslands hefði lýst því yfir í Menntaskólanum á Akureyri að hann væri alfarið á móti því að ananas væri settur á pítsur. Bætti hann við að ef hann gæti sett lög myndi hann hreinlega banna ananas á flatbökur.

Fáar fréttir Vísis af Guðna, ef þá nokkur, hefur vakið aðra eins athygli. Þúsundir manna hafa tekið þátt í könnun þar sem spurt er hvort ananas eigi heima á pítsum. Þar hadfa 17 þúsund manns tekið þátt og segja 60 prósent þátttakenda að ananas eigi fullan rétt á sér.

Mynd: DV ehf / Sigtryggur Ari

Ungur Hafnfirðingur, Aðalsteinn Hannesson stendur fyrir undirskriftasíðu á change.org þar sem krafist er þess að Guðni segi af sér í kjölfar málsins. Ljóst er að ekki er mikil alvara á bak við þessa áskorun hjá Aðalsteini og hún sett fram á glettinn hátt, þá hafa 53 skrifað undir og eru annað hvort að taka þátt í brandaranum eða er alvarlega misboðið að Guðni sé á móti ananas á pítsur. Á síðunni segir:

„Þessi ummæli hans eru hrein og bein árás á þá fjölmarga ananas-pítsu elskendur sem hafa kallað þetta land heimili sitt án aðkasta í þúsundir ára. Ef Guðni fær sínu fram, mun það án efa koma á borgarastyrjöld meðal Íslendinga, sem ananas-pítsu elskendur hafa ekki hugsað sér að tapa.

Þá segir einnig:

„Fyrir mörg okkar erum við líka svikin af Guðna Th., þar sem hann valdi að sitja á þessum öfgafullu skoðunum sínum, fram yfir forsetakosningarnar. Því hljóta úrslit forsetakosninganna 2016 að verða ógild, þar sem ómögulega er hægt að styðja slíkan öfgamann í opinberu embætti, hvað þá sem fulltrúa lýðveldisins.

Við krefjumst þess að Guðni Th. Jóhannesson annað hvort stigi til hliðar sem forseti Íslands, eða sýni virðingu í verki og borðar eina 16" Hawaii pítsu, sem og biðja alla ananas-pítsu elskendur Íslands formlega afsökunar.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.