Brad Pitt er reiður út í Angelinu Jolie eftir að hún sótti um skilnað frá honum og er tilbúinn að berjast við hana um forræði yfir börnum þeirra sex. Þetta segir heimildarmaður TMZ sem fjallaði fyrst um skilnað þeirra hjóna í gær.

Slúðurmiðlar vestanhafs hafa farið hamförum í umfjöllun um skilnað Pitts og Jolie undanfarinn sólarhring og hafa ýmsar ástæður verið nefndar fyrir því af hverju Jolie ákvað að sækja um skilnað. Látið hefur verið að því liggja að Jolie hafi verið óánægð með uppeldisaðferðir Pitts og framkomu hans í garð barna þeirra hjóna. Þá hefur því verið fleygt fram að Pitt hafi haldið framhjá eiginkonu sinni með frönsku leikkonunni Marion Cotillard, en þau leika saman í myndinni Allied sem verður frumsýnd síðar á árinu. Loks hefur verið þeirri kenningu verið haldið á lofti að Pitt hafi þótt sopinn helst til of góður og verið skapstór.

Í skilnaðargögnum sem Jolie hefur lagt fram fer hún fram á fullt forræði yfir börnum þeirra og er hún sögð óska þess að Pitt fái einungis að hitta þau. Þetta virðist hafa farið illa í Pitt og segir heimildarmaður TMZ að hann sé mjög reiður út í Jolie. Þá sé hann tilbúinn að „berjast“ við hana um forræði yfir börnunum sem eru á aldrinum 8 til 15 ára.

Pitt ku auk þess vera óánægður með það hversu hratt fregnir af skilnaðinum spurðust út. Það, hvaða leið Jolie ákvað að fara, hafi gert fjölskylduna að skotmarki papparazzi-ljósmyndara og blaðamanna sem svífast einskis til að ná af þeim myndum. Þetta hafi sett börn þeirra í ákveðna hættu. Mun Pitt hafa viljað að skilnaðinum – og smáatriðum í tengslum við hann – yrði haldið frá sviðsljósi fjölmiðla, börnum þeirra til hagsbóta.

Heimili hjónanna í Los Angeles er nú umkringt blaðamönnum og ljósmyndurum.

Heimildarmaður TMZ segir, eins og bent er á hér að framan, að Jolie hafi verið óhress með uppeldisaðferðir Pitts og verið búin að fá sig fullsadda af honum. Þá hafi áfengis- og grasneysla Pitts farið fyrir brjóstið á Jolie. Loks sé það skoðun Jolie að þau stefni í sitthvora áttina í lífinu og eigi ekki samleið lengur. Jolie vilji einbeita sér í meiri mæli að mannúðarmálum en Pitt vilji halda áfram að leika í kvikmyndum.