Sól, strönd og stórbæjarlíf lokkar marga út fyrir landsteinana ár hvert. Það þarf auðvitað að taka eitt og annað með í ferðalagið, þar á meðal vegabréf og flugmiðana en sumt má alls ekki taka með því þungar refsingar geta legið við að koma til ákveðinna landa með ákveðna hluti.

Það sem er leyft hér heima og telst eðlilegt, getur verið algjör bannvara á áfangastaðnum. Við brotum á þessu getur fólk þurft að greiða sekt, missir ólöglega hlutinn og í versta falli getur það endað í fangelsi.

Eitt af því sem mjög mismunandi reglur gilda um eru rafrettur og tengdir hlutir. Unilad skýrir frá þessu.

Í Taílandi er algjörlega óheimilt að veipa og þungar refsingar liggja við að koma með veipvörur til landsins og það sama gildir um að vera með slíkar vörur í fórum sínum.

Í Singapúr er bannað að eiga og nota rafrettur.

Á Indlandi er engin miskunn sýnd og innflutningur eða notkun veipbúnaðar getur haft í för með sér sekt upp á sem nemur allt að 800.000 íslenskum krónum og eins árs fangelsi. Skiptir þá engu hvort nikótín er í búnaðinum.

Í Mexíkó er bannað að flytja veipbúnað inn sem og að selja slíkan búnað. Yfirvöld geta sektað brotlega um sem nemur allt að 1,5 milljónum íslenskra króna.

Í Hong Kong liggur allt að sjö ára fangelsi fyrir ólöglegan innflutning eða sölu á veipbúnaði.