Izabela kom til Bretlands árið 2009 til að vinna og reyndi fjölskylda hennar hvað hún gat að hafa upp á henni eftir að það hættist að heyrast frá henni. Það var hins vegar ekki fyrr en fyrr á þessu ári sem formleg tilkynning um hvarf hennar barst og hóf lögregla í kjölfarið rannsókn málsins.
Lögreglan í Derbyshire hefur nú tilkynnt að lík hafi fundist í tengslum við leitina að Izabelu. Í frétt BBC kemur fram að líkamsleifarnar hafi fundist í garði við hús sem Izabela bjó í áður en hún hvarf. Telur lögregla allar líkur á að líkið sé af Izabelu.
Fjórir hafa nú verið handteknir vegna rannsóknar málsins og liggja þeir undir grun um að hafa ráðið henni bana. Hinir handteknu eru tvær 39 ára konur, 43 ára kona og 41 árs karlmaður.
Rannsókn málsins er á frumstigi og segir lögregla að nú taki við vinna við að bera kennsl á líkið. Viðbúið er að sú vinna geti tekið nokkrar vikur. Þá hafa aðstandendur Izabelu í Póllandi verið upplýstir um málið. „Hugur okkar er hjá þeim á þessum erfiðu tímum,“ sagði lögregla í yfirlýsingu til BBC.
