Jacqueline hafði hitt hundana daginn áður og virkuðu þeir yndislegir þó þeir væru stórir og sterklega byggðir. Eigendurnir höfðu lofað því að þegar hún kæmi yrðu hundarnir læstir inni í búri.
Það kom henni því nokkuð spánskt fyrir sjónir að sjá að hundarnir voru lausir inni í íbúðinni þegar hún opnaði útidyrnar. Lucy var þýskur fjárhundur en Bender var blanda af boxer og pit-bull.
Jacqueline hafði síðan hún var unglingur passað hunda fyrir allskonar fólk, enda elskaði hún þá og taldi sig tengja vel við þá. Andrúmsloftið þegar hún kom inn í húsið þennan örlagaríka dag var þó svolítið annað en daginn áður því Lucy og Bender réðust strax á Jacqueline.
Í umfjöllun CBS á sínum tíma kom fram að þeir hefðu bitið hana alls um 800 sinnum. Má í raun segja að þeir hafi rifið af henni andlitið, svo slæmir voru áverkarnir. Þegar Jacqueline komst loks undir læknishendur var brugðið á það ráð að halda henni sofandi á meðan hún undirgekkst sjö klukkustunda aðgerð. Um tíma var ekki víst að hún myndi lifa þetta af.
Hundarnir voru teknir höndum og skömmu eftir árásina var tekin ákvörðun um að þeir skyldu aflífaðir.
Jacqueline hefur leyft fólki að fylgjast með bataferli sínu síðustu árin en síðastliðin þrjú og hálft ár hefur hún alls gengist undir 28 aðgerðir. Heldur hún úti vinsælum síðum á Instagram og TikTok og er markmið hennar að vekja athygli á því að hundar geta verið hættulegir.
Í færslum sínum hefur Jacqueline til dæmis sagt frá því að læknar hafi til dæmis grætt húð á andlit hennar sem tekin var af rasskinnunum. Þá voru varir hennar endurbyggðar með húð af lærinu.
Hún gekkst á dögunum undir sína 28. aðgerð og segir að þrátt fyrir lítinn svefn eftir aðgerðina hafi hún verið vel þess virði miðað við árangurinn.
„Ég geti allavega með sanni sagt að ég er farin að sjá sjálfa mig aftur,“ sagði hún og þakkaði læknum fyrir alla þá aðstoð sem þeir hafa veitt henni. Hún birti svo mynd af sér á Instagram á dögunum þar sem sjá mátti hvernig andlitið hefur gróið eftir síðustu aðgerð. „Augað er enn að jafna sig á bólgum en þetta græt vel,“ sagði hún.
Fylgjendur hennar á Instagram hafa hrósað henni fyrir hugrekkið sem hún hefur sýnt með því að tala opinberlega um þessa skelfilegu reynslu. Margir eru líka þeirrar skoðunar að árangurinn sem læknar hafa náð sé aðdáunarverður. „Vá, ég sé breytinguna frá síðustu aðgerð. Þetta er magnað,“ sagði til dæmis einn. „Árangurinn er sannarlega frábær. Það er gaman að sjá þig verða þú sjálf aftur. Læknarnir þínir eru sannkallaðir listamenn.“
Jacqueline dvaldi í alls 60 daga á sjúkrahúsi eftir árásina en hún missti mjög mikið blóð eins og sést á meðfylgjandi myndum sem teknar voru eftir árásina.
