Maria Felding, sem er klínískur næringarfræðingur, segir að lykillinn að varanlegu þyngdartapi sé hvorki baðvogin, eldhúsvogin eða hitaeiningareiknaðar mataráætlanir.
Í bók sinni „En ulige kamp – Derfor er det så svært at vedligeholde et vægttab“ (Ójafn leikur – Þess vegna er svo erfitt að viðhalda þyngdartapi), segir hún að fólk eigi ekki að halda sig við eitt ákveðið mataræði þegar það ætlar að léttast og skipta síðan yfir í annað mataræði þegar það ætlar að viðhalda þyngdartapinu. Þegar þetta sé gert, fari hlutirnir úr skorðum og talan á baðvoginni fari að hækka í takt við að fólk taki aftur upp gamlar venjur af því að það heldur það ekki lengur út að borða „megrunarfæðið“ með öllum þeim hömlum sem því fylgi.
Hún segir að það sé hægt að segja að gamla mataræðið hafi passað vel við gömlu þyngdina og ef fólk fari aftur yfir í þetta mataræði, endi það mjög líklega með að þyngjast aftur.
Hún deildi þremur góðum ráðum úr bókinni með Ekstra Bladet og hér eru þau:
Þekktu sjálfan þig – Hún segir að fólk þurfi að vera meðvitað um að ekki sé hægt að ábyrgjast þyngdartap ef maður fylgir ákveðinni standard aðferð eða nútíma aðferðum. Það sé mjög einstaklingsbundið hvernig fólk léttist og því þurfi fólk að skoða sjálft sig vel í stað þess að fara bara á baðvogina.
Það sem skipti máli, sé hvernig maður varð of þungur í upphafi. Ef það að léttast er mjög mikilvægt fyrir lífsgæðin, þá ráðleggur hún fólki að fara í málið af alvöru og fá sérfræðiaðstoð til að skilja ástæðuna að baki ofþyngdinni. Eru það aðallega líkamlegar eða andlegar ástæður sem eiga hlut að máli? Annars viti maður ekki hvernig sé hægt að takast á við þetta. Það sama gildi ekki fyrir alla.
Af hverju í staðinn fyrir hvað – Hún segir að maður þurfi að einblína á af hverju maður borðar í staðinn fyrir hvað maður borðar. Þyngdartap snúist oftast meira um hegðun en mat. Þess vegna sé alltaf góð hugmynd að beina sjónunum að af hverju maður borðar eins og maður gerir, ekki bara á hvað maður borðar þegar maður borðar.
Ávextir, trefjar og prótín – Hún segir að líkaminn sé mjög góður í að senda sterk hungurskilaboð, jafn góður og í að senda þreytuskilaboð. Hann sjái alveg örugglega um að maður verði nægilega þreyttur til að sofna. Á sama hátt sé hann góður í að fá mann til að borða. Það sé ekki hægt að berjast á móti líffræðinni. Þegar maður léttist, þá verði maður svengri og verði að takast á við þá tilfinningu.
Hún ráðleggur fólki að borða mettandi mat. Þetta sé einfalt en mikilvægt ráð. Hún sagði að fyrir marga hafi virkað vel að borða ávexti, grænmeti og magurt prótín. Þetta fylli vel og metti og innihaldi mikið af góðum trefjum.
