Snemma að morgni 19. febrúar 1990 var Kevin Childerley, 30 ára, stunginn til bana í „hrottalegri árás“ þar sem hann svaf í rúminu sínu við hlið eiginkonu sinnar, Denise. Hún var einnig stungin en lifði árásina af en sauma þurfti 160 spor í hana. Tvö ung börn þeirra voru heima þegar þetta gerðist.  Fjölskyldan bjó í Mansfield Woodhouse.

Lögreglan handtók nýlega 62 ára konu sem er grunuð um að hafa leynt upplýsingum varðandi árásina. Hún var síðar látin laus gegn tryggingu.

Ruby Burrow, yfirlögregluþjónn, sagði að „málinu hafi aldrei verið lokað“ og að lögreglumenn hafi notað nýjustu tækni í leit að svörum. Hún sagði að árásin hafi verið „hrottaleg“ og elskaður faðir hafi verið sviptur lífinu og eiginkona hans hafi hlotið áverka sem munu fylgja henni alla ævi.

„Á meðan á rannsókninni stóð vorum við staðráðin í að láta réttlætið ná fram að ganga fyrir fórnarlömbin og fyrir börnin tvö og barnabörnin sem fá aldrei að hitta afa sinn,“ sagði hún einnig að sögn Sky News.

Burrow sagði að handtakan væri „mikilvægur áfangi“ og hvatti fólk til að gefa sig fram við lögregluna ef það hefur einhverjar upplýsingar um málið.

„Við vitum að svarið við hver myrti Kevin er að finna í samfélaginu og við teljum einnig að bandalög og tryggðabönd hafi breyst á þeim rúmu þremur áratugum sem eru liðnir,“ sagði hún að lokum.