Margar kenningar hafa verið settar fram í gegnum tíðina um örlög vélarinnar og hafa samsæriskenningasmiðir ekki dregið af sér við smíði slíkra kenninga.
Nú hefur verið ákveðið að gera eina tilraun enn til að finna flak vélarinnar en talið er fullvíst að það liggi á hafsbotni. Smávegis brak úr því hefur fundist en hvað varðar staðsetningu flaksins, þá er ekkert fast í hendi.
Malasíska ríkisstjórnin vinnur að gerð samnings við bandaríska fyrirtækið Ocean Infinity um að skanna hafsbotninn í von um að flakið finnist. Er þetta að sögn gert vegna nýrra upplýsinga sem hafa komið fram um hvarf vélarinnar.
Áður höfðu malasísk, kínversk og áströlsk yfirvöld greitt sem svarar til rúmlega 20 milljarða íslenskra króna fyrir tveggja ára, árangurslausa leit, að vélinni. Að henni lokinni var tilkynnt að ekki yrði leitað frekar að vélinni nema „nýjar og trúverðugar upplýsingar um staðsetningu hennar kæmu fram“.
Ocean Infinity gerði samning 2018 um leit að vélinni á grundvelli nýrra útreikninga um stefnu vélarinnar áður en hún lenti í sjónum. Sú leit bar engan árangur.
Aðeins greitt ef flakið finnst
Nú mun Ocean Infinty reyna aftur að finna vélina og skilyrðin eru þau sömu og síðast: „No find – no fee“ sem felur í sér að fyrirtækið fær ekki greitt fyrir verkefnið nema flak vélarinnar finnist. Ef það finnst, þá fær fyrirtækið 70 milljónir dollara í sinn hlut, það er sama upphæð og samið var um 2018.
Samningagerðin stendur enn yfir, til dæmis á eftir að skilgreina hvað flugvélarflak er. Ekki mun duga að finna einstaka hluta flaksins.
En þrátt fyrir að samningsgerðinni sé ekki alveg lokið, þá hefst leitin nú á næstu dögum vegna þess að þá eru veðurskilyrðin með besta móti á svæðinu en það er þekkt fyrir mjög erfið veðurskilyrði.
