Um er að ræða íbúð á efstu hæð hússins og hefur húsfélagið í byggingunni nú höfðað mál gegn honum og krafið hann um greiðslu bóta upp á um 300 milljónir íslenskra króna. Segja lögmenn húsfélagsins að vanrækslan hafi hreinlega stefnt burðarvirki hússins í hættu og ráðast þurfi í viðamiklar framkvæmdir.
Myndir úr íbúðinni hafa nú verið birtar opinberlega en það gerðist eftir að málið var dómtekið í New York á dögunum. Á þeim má sjá að ekki hefur verið hirt um íbúðina í langan tíma; málning hefur flagnað af veggjum og mygla og rakaskemmdir eru víða.
Í fréttum bandarískra fjölmiðla kemur fram að Copperfield, sem er langríkasti sjónhverfingamaður heims, hafi keypt íbúðina árið 1997 og flutt úr henni árið 2018. Hún er enn í hans eigu en hefur verið á sölu í þó nokkurn tíma. Eignir Copperfields eru metnar á vel yfir hundrað milljarða króna.
New York Post segir frá því að rör fyrir ofan íbúðina hans hafi sprungið árið 2015 með þeim afleiðingum að vatn flæddi inn í fjölmargar íbúðir hússins. Um var að ræða rör sem liggur frá sundlaug í hans eigu sem er á þaksvölum hússins. Og í desember síðastliðnum gaf sig annað rör með svipuðum afleiðingum.
Í stefnunni kemur fram að Copperfield hafi látið undir höfuð leggjast að bregðast við ítrekuðum ábendingum húsfélagsins um að sinna þyrfti viðhaldi. Sjálfur er hann sagður neita að bera nokkra ábyrgð á tjóni hússins og segja lögmenn hans að um tryggingamál sé að ræða.
Copperfield var nýlega sakaður um kynferðisbrot af fjölda kvenna og voru einhverjar þeirra undir 18 ára þegar meint brot áttu sér stað. Lögmenn hans voru fljótir að neita ásökununum.
