Ráðherrann fyrrverandi, sem heitir Ousman Sonko, sótti um hæli í Sviss en þess í stað þarf hann að eyða næstu 20 árum í þarlendu fangelsi. Hann var meðal annars sakfelldur fyrir að hafa tekið þátt í ofsóknum gegn andstæðingum forsetans fyrrverandi og fyrir að hafa ekki komið í veg fyrir ofbeldisverk sem voru framin af pólitískum ástæðum.
Í stjórnartíð Jammehs hurfu gagnrýnendur hans sporlaust, margir voru fangelsaðir án þess að réttað væri yfir þeim, fangar voru pyntaðir, heimasíðum, sem gagnrýndu stjórnvöld, var lokað og fjölmiðlum var fyrirvaralaust gert að hætta starfsemi.
En það voru ekki bara pólitískir andstæðingar forsetans, blaðamenn og baráttufólk fyrir mannréttindum sem sætti ofsóknum. Í huga forsetans var samkynhneigð meðal þriggja stærstu ógnanna við mannkynið og hann taldi réttast að hálshöggva allt samkynhneigt fólk.
Jammeh var hrakinn frá völdum 2017 eftir að hann neitaði að viðurkenna ósigur í kosningum en þá bar Adama Barrow, leiðtogi stjórnarandstöðunnar, sigurorð af honum. Barrow varð að sverja embættiseiðinn í nágrannaríkinu Senegal því Jammeh ríghélt í völdin og sagðist reiðubúinn til að „stýra þessu landi í einn milljarð ára“.
Það var ekki fyrr en herlið frá Senegal, Nígeríu og Gana réðust inn í Gambíu að Jammeh gafst upp og flúði land.
Sonko var innanríkisráðherra hans frá 2006 til 2016 en þá var honum vikið úr embætti. Hann hélt til Sviss og sótti um hæli. Tveimur mánuðum eftir komuna þangað var hann handtekinn og ákærður fyrir afbrot framin í Gambíu.
Hann var sakfelldur fyrir morð, pyntingar og að hafa varpað fólki í fangelsi án þess að réttað væri yfir því.
Réttarhöldin hófust í janúar og dómur var kveðinn upp í síðustu viku. Sonko getur áfrýjað niðurstöðunni.
