Ebrahim Raisi, forseti Írans, lést í þyrluslysi á sunnudaginn þegar þyrla hans hrapaði til jarðar í héraðinu Austur-Aserb­aísjan sem liggur upp að Aserb­aísjan. Mohammad Javad Zarif, fyrrum utanríkisráðherra Írans, segir að Bandaríkin beri að hluta ábyrgð á slysinu og þar með dauða Raisi.

AP segir að í viðtali við íranska ríkissjónvarpsstöð í gær hafi Zarif sagt að þyrlan, sem flutti forsetann, hafi verið gömul og það hafi vantað varahluti í hana. Ástæðan er að Bandaríkin hafa sett viðskiptabann á Íran og nær það meðal annars til sölu á varahlutum í loftför.

Sagði Zarif að með þessu komi Bandaríkin í veg fyrir að íranskur almenningur geti notið góðra samgangna í lofti.

Hossein Amir-Abdollahiani, utanríkisráðherra, fórst einnig í slysinu. Það átti sér stað í fjalllendi og var þykk þoka þar yfir þegar slysið varð en ráðherrarnir voru á heimleið eftir heimsókn í Aserb­aísjan.

Íranska ríkisfréttastofan IRNA segir að þyrlan hafi verið af gerðinni Bell 212. Þetta er útgáfa af hinni þekktu Bell 212 Twin Huey herþyrlu sem Bandaríkjaher notaði mikið í Víetnam stríðinu. Bell 212 er ætluð til almenningsnota. Þyrlur af þessari tegund hafa verið í notkun síðan á sjöunda áratugnum.

IRNA segir að Íranir hafi keypt þyrluna í byrjun aldarinnar og hafi hún verið mikið notuð síðan. En vegna viðskiptaþvingana Bandaríkjanna og annarra Vesturlanda er skortur á varahlutum í þyrlur og flugvélar í Íran.

Írönsk yfirvöld hafa ekki gefið út neina yfirlýsingu um hvað hafi valdið slysinu en Zarif er ekki sá eini sem bendir á varahlutaskortinn sem hluta af ástæðunni.

Cedric Leighton, hernaðarsérfræðingur og  fyrrum ofursti í flughernum, sagði í samtali við CNN að hann telji að það hafi verið samspil veðurs og viðskiptaþvingana sem hafi valdið slysinu.

Zarif var mun beinskeyttari í orðum sínum og sagði að slysið muni bætast við listann yfir glæpi Bandaríkjanna gegn írönsku þjóðinni.