Hversu oft á eiginlega að skipta um sængurver, koddaver og lök? Það er eflaust mjög mismunandi hversu oft fólk skiptir á rúmum sínum en það er rétt að hafa í huga að þegar við liggjum í rúminu þá losnar mikið magn af dauðum húðfrumum af okkur og auk þess erum við þakin bakteríum. Sviti er síðan eitthvað sem við losum okkur við á meðan við sofum.

Allt þetta laðar rykmaura að sér og þeir kunna vel við sig í rúmum okkar og sængurfatnaði. Saur þeirra inniheldur efni sem geta valdið kláða í nefi og pirringi í augum að sögn Marie-Louise Danielsson-Tham, prófessors. Vivilla.se skýrir frá þessu.

Hún sagði að það sé góð regla að skipta á rúmum á fjórtán daga fresti, með því sé hreinlætis gætt og einnig sé hugsað um umhverfið með því. En á öllum reglum er undantekning og hvað þetta varðar þá skiptir veðrið einnig máli. Við svitnum meira á sumrin og því ætti að skipta oftar um þá að hennar sögn og auðvitað á að skipta um ef rúmfötin eru skítug.

Það er sem sagt mikilvægt að skipta reglulega á rúmunum en það er líka jafn mikilvægt að búa ekki um þau um leið og farið er á fætur. Prófessorinn sagði að gott sé að láta sængur og kodda vera í birtu og fersku lofti í góða stund eftir að farið er á fætur og best sé að búa ekki um fyrr en síðdegis því ferskt loft og kuldi drepi rykmaurana. Enn betra er að taka sængina og koddann úr rúminu á meðal loftað er út.