Bandaríska geimferðastofnunin NASA birti nýlega myndir og myndband af risastórum hraunpolli á yfirborði Io sem er risastórt tungl á braut um Júpíter.

Um tölvugert myndefni er að ræða en það er byggt á upplýsingum sem Juno-geimfarið aflaði þegar það flaug í aðeins 1.500 km fjarlægð frá Io í desember 2023 og janúar 2024. Aldrei áður hefur gagna um Io verið aflað úr svo mikilli nálægð við tunglið.

Mörg hundruð virk eldfjöll eru á Io og segir NASA að stundum séu gosin úr þeim svo öflug að hægt sé að sjá þau með sjónaukum hér á jörðinni.

Nýju myndirnar sýna Loki Patera, sem er 200 km langur hraunpollur á yfirborði Io. Vísindamenn hafa fylgst með þessu polli áratugum saman. Hann er beint ofan á stórum kvikutanki undir yfirborðinu.

Kólnandi hraun í miðju pollsins er umkringt því sem er hugsanlega bráðnuð kvika að sögn Scott Bolton, aðalvísindamanns Juno-verkefnisins.

Hann sagði að gögnin sem Juno aflaði bendi til að hluti af pollinum sé eins sléttur og spegill.