Norður-kóreskir fjölmiðlar, sem lúta allir stjórn einræðisstjórnarinnar, skýrðu frá þessu á föstudaginn og segja að tilraunirnar hafi farið fram í síðustu viku. Segja miðlarnir að her landsins hafi prófað þessa dróna sem geti valdið „risastórum“ flóðbylgjum og að hægt sé að beita þeim hvar sem er í heiminum.
Þetta „leynivopn“ var sett í sjóinn í Hamgyon-héraðinu á þriðjudaginn og sprengioddur þess sprakk á fimmtudaginn. Það hafði þá verið í sjónum í tæpar 60 klukkustundir á 80 til 150 metra dýpi að sögn norður-kóresku fjölmiðlanna.
Að sjálfsögðu var það Kim Jong-un, einræðisherra, sem „stýrði“ æfingunni og sagði að hún væri aðvörun til Bandaríkjanna og Suður-Kóreu sem ættu að átta sig á ótakmarkaðri getu Norður-Kóreu á kjarnorkuvopnasviðinu.