Fangar í Massachusetts í Bandaríkjunum gætu átti möguleika á því að fá refsingu sína stytta ef þeir gefa líffæri eða beinmerg, verði nýtt frumvarp sem lagt hefur verið fram í ríkinu að lögum.

Frumvarpið fjallar um að koma á fót líffæragjafakerfi innan refsivörslukerfisins en tveir þingmenn, báðir úr flokki demókrata, hafa lagt frumvarpið fram.

Verði það að lögum mun þessi valkostur standa föngum til boða og stytta refsingu þeirra um allt frá 60 dögum upp í heilt ár. Samhliða þessu yrði komið á fót fimm manna nefnd sem myndi sjá um fyrirkomulagið. Nefndin myndi þá taka ákvörðun um hverjir séu gjaldgengir í fyrirkomulagið og hversu mikinn merg eða hversu mörg líffæri þyrfti að gefa til að refsing yrði stytt.

Sem stendur er föngum aðeins heimilt að gerast líffæragjafar fyrir nánustu fjölskyldu. Ekki einu sinni fangar á dauðadeild mega gefa líffæri jafnvel þó þeir séu skráðir líffæragjafar.

Gagnrýnendur á frumvarpið hafa þó bent á að fyrirkomulaginu geti fylgt hætta á að fangar verði beittir þvingunum og eins að óásættanleg heilbrigðisþjónusta í fangelsum geti haft áhrif. Fyrirkomulagið gæti í sjálfu sér verið ákveðin þvingun og fangar væri því í reynd ekki að gefa líffæri eða beinmerg af algjörlega fúsum og frjálsum vilja.

Gagnrýnendur hafa eins bent á að með fyrirkomulaginu sé í reynd verið að líta á fanga sem eins konar líffæra birgja, fremur en manneskjur. Í reynd hljómi hugmyndin eins og eitthvað sem skrifað er um í hryllingssögum eða vísindaskáldskap.