Samskipti fólks hafa tekið gífurlegum breytingum síðustu áratugi eftir að Internetið nam land á nánast hverju heimili. Við erum tengdari en nokkru sinni fyrr, enda þekkjast landamæri vart í netheimum. Þetta hefur á sama tíma þýtt að óprúttnir aðilar eiga greiðari aðgang að okkur en áður, enda þurfa þeir ekki að klöngrast upp á svalirnar okkar heldur getur ráðist inn til okkar án þess að vera einu sinni í sama landi og við.

Fyrir nokkru byrjaði ung stúlka í Michigan í Bandaríkjunum að fá hatursfull skilaboð frá nafnlausum aðila. Hún leitaði á endanum til skólastjórnenda í gagnfræðaskóla sínum, enda taldi hún að eineltið kæmi frá jafnaldra. Bæði hún og kærasti hennar höfðu orðið fyrir þessu netníði og skólastjórnendur litu þetta alvarlegum augum. Móðir stúlkunnar, Kenda Licari, tók málinu eins alvarlega, sem og móðir kærastans. Skólastjórnendur ásamt mæðrunum ákváðu að vinna í sameiningu að því að upplýsa málið.

Loks var ákveðið að leita til lögreglunnar, eftir að skilaboðin héldu áfram að berast. Það var þá sem kom á daginn að Licari var að leggja sína eigin dóttur í einelti. Hún var í kjölfarið ákærð fyrri umsáturseinelti gegn barni, tölvuglæpi og fyrir að torvelda lögreglurannsókn. Hún játaði á sig sakir, en hefur enn ekki gefið upp hvers vegna í ósköpunum hún ákvað að hrella sína eigin dóttur mánuðum saman með hrottalegum skilaboðum.

Licari var í apríl dæmd til að afplána allt að fimm ár í fangelsi fyrir brot sín.