Hin pólska, Julia Faustyna – sem einnig gengur undir nafninu Julia Wendell, komst í heimsfréttirnar á dögunum þar sem hún heldur því fram að hún sé í raun Madeleine McCann, breska stúlkan sem hvarf í sumarleyfi með fjölskyldu sinni í Portúgal árið 2007, þá aðeins fjögurra ára gömul.

Wendell hefur haldið þessu fram á samfélagsmiðlunum Instagram og Tiktok þar sem hún birtir efni undir nafninu @iammadeleinemccann.

Erlendir fjölmiðlar greina nú frá því að Wendell hafi lagt fram fjögur sýni, þar á meðal DNA-sýni,  sem verða rannsökuð og gætu gefið vísbendingu um hvað sé satt og logið í málinu. Dr. Fia Johansson greinir frá þessu í samtali við RadarOnline.com en markmiðið með prófunum er að meta hvort Wendell sé sannarlega frá Bretlandseyjum. Verði það raunin verður farið dýpra í rannsóknina og reynt að fá erfðaefni hennar borið saman við McCann-fjölskylduna.

Dr. Johansson segir að Wendell hafi verið flutt á öruggan stað í Bandaríkjunum en í kjölfar heimsfrægðarinnar hafi henni borist fjöldinn allur af líflátshótunum.

„Við höfum fjölda sannanna sem sýna fram á að Julia var fórnarlamb mansals á vegum alþjóðlegs hrings barnaníðinga og flutt til Póllands. Við erum enn að rannsaka málið en það er alveg ljóst að Julia er ekki líffræðileg dóttir foreldra sinna,“ segir Dr. Johansson.