Ingenuity, Marsþyrla Bandarísku geimferðastofnunarinnar NASA, sendi nýlega lokaskilboð sín til jarðarinnar. Í þeim var meðal annars lokakveðja til vísindamannanna sem komu að því að senda hana til Mars og stýrðu þar. En þyrlan hefur ekki alveg lokið hlutverki sínu og mun gefa mannkyninu „lokagjöf“ en einn hængur er á þessari góðu gjöf.

Þyrlan mun halda áfram að afla gagna á meðan hún hefur straum til. Þessi gögn gætu komið að góðu gagni við Marsleiðangra framtíðarinnar. En sá hængur er á að við verðum að fara til Mars, eða senda vélmenni þangað, til að sækja þessi gögn.

Þyrlan er á stærð við dúfu. Hún lenti á Mars 18. febrúar 2021 ásamt Perseverance bílnum. Hún tók sig fyrst á loft þann 19. apríl 2021 og var það í fyrsta sinn sem manngerður hlutur flaug á annarri plánetu.

Markmiðið var að þyrlan skyldi fara í 5 flug á 30 dögum en þegar upp var staðið hafði hún farið í 72 flug og var á lofti í rúmlega tvær klukkustundir i heildina. Hún flaug 14 sinnum lengra en upphaflega var áætlað að því er segir í tilkynningu frá NASA.

Þyrlan fór í sitt síðasta flug 18. janúar á þessu ári. Hún brotlenti þá eftir að hafa misst samband við stjórnstöð NASA í skamma stund. Tveir af fjórum spöðum hennar skemmdust og er hún því ekki flugfær.