Brúðkaupsferð nýgiftu brúðhjónanna Jelizaveta og Gavin Jones frá London breyttist í martröð þegar hún var ekki einu sinni búin að vara í sólarhring. Jones-hjónin gerðu sér ferð til karabíska hafsins í tilefni brúðkaupsins og gistu á 5 stjörnu hótelinu Sandals Royal á eyjunni Curaçao.
Hjónin voru að njóta fyrsta dagsins í svokallaðri „óendanlegri“ sundlaug á hótelinu ásamt 18 öðrum þegar sundlaugin hrundi með þeim afleiðingum að 12 særðust, þar á meðal þau Jelizaveta og Gavin. Lögreglan á svæðinu telur að sundlaugin hafi hrunið vegna þess að of mikið af fólki hafði verið í henni á sama tímapunktinum.
Jelizaveta, sem er 29 ára gömul, þurfti að fá spor á höfuðið en hún segir í samtali við Evening Standard að slysið hafi ekki gert neitt boð á undan sér. „Þetta var hræðilegt,“ segir hún. „Þegar ég náði að standa upp þá haltraði ég og fann blóð koma úr höfðinu mínu og fætinum mínum. Í hvert skipti sem ég loka augunum endurupplifi ég þetta. Ég gat ekki hugsað, ég gat ekki andað.“
Gavin, sem er 44 ára gamall, lýsir því einnig hvernig hann upplifði slysið. „Ég stóð með bakið í áttina að sjónum og var að tala við eiginkonuna mína þegar ein platan í miðju sundlaugarinnar hvarf bara,“ segir hann. Þá segist hann hafa fengið höfuðhögg og séð svo hvernig blóðið lak úr höfði eiginkonunnar sinnar.
Þegar hann talaði við starfsfólk hótelsins eftir slysið sagði það að „slysin geti gerst“ og bauð hjónunum inneign til að gista aftur seinna á hótelinu.