Chris Baily gerði tilraun á sjálfum sér fyrir nokkrum árum þar sem hann drakk bara vatn í heilan mánuð. Sem sagt ekkert kaffi, engir gosdrykkir eða safi, bara vatn. Rétt er að taka fram að tilraun hans snerist bara um það sem hann drakk, hann hélt áfram að borða eins og áður.
Hann skýrði frá niðurstöðunni á vefsíðu sinni, A Life of Productivity, og er óhætt að segja að niðurstöðurnar séu forvitnilegar.
Meðal þess sem hann áttaði sig á er að með því að drekka aðeins vatn minnkar hitaeininganeyslan. Vatn er góður kostur til að tryggja líkamanum vökva án þess að innbyrða hitaeiningar. Í þessu sambandi má nefna að te með sykri inniheldur um 30 hitaeiningar og 0,5 lítrar af sykruðum gosdrykk um 210 hitaeiningar.
Heilinn okkar samanstendur að stórum hluta af vatni, eða 75-85%. Það er því mikilvægt að drekka nóg til að halda heilanum í toppstandi. Með því verður einbeitingin betri og orkan meiri. Það er einmitt það sem gerðist hjá Baily.
Það að drekka bara vatn hefur jákvæð áhrif á matarlystina, það er að segja það dregur úr henni. Oft finnst okkur að við séum svöng en í raun erum við bara þyrst. Það getur slegið á svengdartilfinningu að drekka vatn og þess utan er mikilvægt að tryggja að líkaminn fái alltaf nægan vökva.
Vatnsdrykkja er góð fyrir húðina og ef þú drekkur nóg af vatni eru minni líkur á að þú hafir þörf fyrir dýr krem fyrir andlitið og líkamann. Ef vatn er tekið fram fyrir aðra drykki verður húðin sléttari, stífari og húðormum, bólum og blettum fækkar.
Með því að drekka bara vatn sparast peningar, það er að segja ef kranavatn er drukkið. Það er jú ekki ókeypis að kaupa vatn í flösku eða aðra drykki. Það er því góð hugmynd að kaupa góða margnota flösku undir vatn. Þannig er hægt að vera alltaf með nóg vatn og ekki skemmir fyrir að þetta er umhverfisvænt.
Baily áttaði sig einnig á að vatnsdrykkja er góð fyrir efnaskipti líkamans og mælir með því að fólk drekki vatn fljótlega eftir að það fer á fætur.
Það að drekka nóg af vatni er gott fyrir hjartað og dregur úr líkunum á hjarta- og æðasjúkdómum.
