The Guardian hefur eftir Alasdair Burns, sem leiðbeinir fólki um stjörnuskoðun, að hann hafi fengið skilaboð frá vini sínum á áttunda tímanum um að hann skyldi drífa sig út og horfa til himins. „Um leið og við vorum komin út var augljóst hvað hann átti við,“ er haft eftir Burns.
Hann sá risastóran bláan spíral í næturmyrkrinu. „Þetta líktist risastórri spírallaga vetrarbraut, var bara þarna í skýjunum og færðist hægt og rólega um,“ sagði hann.
Meðal þeirra kenninga sem voru settar fram um spíralinn var að hér væri um fljúgandi furðuhlut að ræða, að þetta væri auglýsing eða eldflaug frá öðru landi.
Richard Easther, prófessor og eðlisfræðingur við Auckland University, sagði að líklega megi rekja þetta til geimskots. Ský af þessu tagi myndist stundum þegar eldflaugum er skotið á loft til að koma gervihnöttum á braut um jörðina. Hér hafi líklega verið um eldflaug frá SpaceX að ræða en fyrirtækið skaut eldflaug á loft á sunnudaginn frá Canaveralhöfða á Flórída.