Fyrr á árinu keypti Thomas Heller, fimmtugur íbúi í Köthen í Þýskalandi, notaðan ísskáp á eBay. Hann greiddi sem nemur um 32.000 íslenskum krónum fyrir hann. Þegar hann opnaði ísskápinn reyndist innihaldið vera ótrúlegt.

Í ísskápnum voru evrur og það ansi margar eða sem svarar til um 20 milljóna íslenskra króna. Fyrri eigandi hafði sett peningana í ísskápinn.

Sem betur fer þá er Heller strangheiðarlegur og hann fór með peningana á næstu lögreglustöð.

Lögreglan lýsti síðan eftir eiganda ísskápsins. Það var 91 árs kona sem hafði búið á elliheimili eftir að eiginmaður hennar lést. MDR segir að þegar konan lést hafi eigur hennar verið seldar, þar á meðal ísskápurinn.

Það var barnabarn konunnar sem sá um söluna og hafði það ekki hugmynd um að peningar væru í ísskápnum.

Thomas fékk fundarlaun en þau voru 3% af heildarupphæðinni. Hann hefur að sögn ekki ákveðið hvað hann gerir við peningana.