Sky News segir að mikil rigning og snjóbráðnun hafi valdið flóðum í hlutum Yellowstone þjóðgarðsins og hafi þurft að grípa til rýmingar. Rafmagn hafi farið af og loka hafi þurft öllum fimm inngöngum þjóðgarðsins í einu, nú þegar ferðamannatíminn er að hefjast af alvöru.
Ekki hafa borist fregnir af slysum á fólki í þjóðgarðinum en margir lentu í vandræðum og þurftu aðstoð björgunaraðila. Cory Mottice, veðurfræðingur hjá the National Weather Service, sagði að flóð af þessu tagi hafi ekki sést áður.
Mikil flóð hafa verið í Montana og er eins barns og tveggja fullorðinna saknað eftir að flóð sópaði þeim á brott eftir mikla rigningu og þrumuveður.
Rúmlega 100 milljónum landsmanna hefur verið ráðlagt að halda sig innandyra í dag. Viðvörunin gildir meðal annars fyrir Kaliforníu, Arizona og Nýju-Mexíkó.