Ástæðan er að borðtuskur geta verið sannkallaðar bakteríusprengjur. Fólk þarf að gæta sérstaklega að því að skipta nógu oft um borðtuskur og taka mið af hvað hefur verið þurrkað með þeim hverju sinni.
Það að þurrka upp kaffiblett eða þurrka af matarborðinu eftir máltíð hefur ekki svo mikið að segja en öðru máli gegnir ef borðtuskan hefur verið notuð til að þurrka upp hrá egg, hrátt kjöt eða kjötsafa, hráan fisk eða grænmeti sem ekki var búið að þvo vel.
Ef þú þurrkar eitthvað af fyrrgreindu með borðtusku þá skaltu setja hana beint inn í þvottahúsið. Það á einnig að skipta um borðtusku daglega því blaut borðtuska í vaskinum er hrein paradís fyrir bakteríur en þær þurfa vatn til að geta fjölgað sér.
Hvað varðar þvott á borðtuskum þá á að þvo þær við minnst 60 gráður og helst 90 gráður.